BINTULU, Jan 20: Ujan bangat kenyau tiga hari ke udah dikeirau ngasuh ampuh bah kedua kali nyadi di pelilih Sebauh, ditu.
Ketegal nya, peranak menua ditu kelebih agi ti diau ba tebing Sungai Kemena enggau Sungai Sebauh diatu ngadang napi penusah nya laban ai majak melema lalu tama ngagai laman rumah sereta parit besai kelebih agi maya malam hari lebuh ai sungai pasang penuh.
SAO Pelilih Sebauh, Frances Sherri Lia madahka Bilik Operasi Ampuh Bah Sebauh diatu dibuka 24 jam ngambi ngemudahka bantu diberi lengkas enti ampuh kedua kali nyadi.
“Peranak ngelingi tau betelefon ngagai Bilik Operasi Ampuh Bah Sebauh nengah lumur 086-422118 nyema penusah nya nyadi ba endur sida,” ku iya.
Ampuh bah nyadi ba Sebauh minggu nyin tadi ngujungka beberapa kandang endur ampuh enggau sebuah sekula agi ditutup nyentuk kemari. — DayakDaily
