Babi babas, rusa majak punas di Malaysia

Wild piglet. — DayakDaily.com file pic. // Photo: Pixabay

KUCHING, Jan 20: Babi babas, rusa sambar enggau remaong entara spesies jelu siga ke majak punas di menua tu, pia ku Menteri Pengeraja Asal enggau Rampa Menua, Datuk Seri Dr Wan Junaidi Tuanku Jaafar.

Ku iya, ketegal penyampau jelu nya kejak mimit, iya merambu ngengkahka nya ba kategori jelu ke deka punas dalam timpuh dua ngagai tiga bulan ke deka datai.

“Babi babas enggau rusa sambar entai rintai pemakai jelu remaong.

“Enti kededua jelu nya punas, reti nya jelu remaong di menua tu mega deka punas ,” ku iya lebuh dikerandau ba
pengerami nyuaka beg sekula ngagai tujuh buah sekula di Parlimen P193 Santubong, kemari.

Wan Junaidi mega madahka asil pansik sebedau tu mandangk semina bisi 250 ngagai 300 iku jelu remaong di negeri tu kelebih agi di Semenanjung Malaysia.

“Kami udah ngaga morotarium ngasu rusa sambar, lalu diatu dek ngaga pengawa ke sebaka ngagai babi babas enggau kijang,” ku iya baru.

Aktiviti ngasu belalai ku iya, balat nyadi laban bisi peminta ke tinggi ba makit Thailand, Laos enggau Kemboja.

Entara jelu ke udah punas di menua tu iya nya spesies Badak Sumatera, ke semina siku aja di Sabah.

Taja pia badak nya “sakit” sereta enda ulih agi beranak.

“Aku deka berunding enggau sida ari Indonesia bekaul enggau isu badak nya laban di menua nya, penyampau iya agi mayuh, lalu ba taun siti nyin tadi ngadaka lima iku anak,” ku iya. — DayakDaily