SIBU: Peragam ati peranak Sarawak ti ngumbai TVET nya pelajar kelas kedua udah ngujung mayuh nembiak di Sarawak agi lembau ngambi bidang nya,ku Jisin Nyud presiden STU nandu jaku ti dipansut Menteri Pengatur pengereja Pengawa, Datuk Seri Richard Riot empai lama udah.
Nya alai ku iya, pengawa ngemetulka peragam ati pasal peakra tu ba apai indai,bala nembiak enggau peranak menua pesisir beguna amat.
“Nya alai aku mantaika perambu penemu ngambika mayuh agi pemandang diatur ngambika bala nembiak enggau apai indai nemu pemesai guna TVET kelebih agi ba peranak menua pesisir.
“Kitai mega beguna mayuh agi sekula vokasional endur ngelatih bala nembiak ba sesebengkah bidang pengelandik”, ku iya.
Jisin madahka STU nyukung perintah ti deka ngerembai sereta ngenegapka bidang Teknikal, Pelajar Vokasional enggau Latih
(TVET) ba ti ditumbuh Institut Pemantih Opis Pengatur Pengereja Pengawa (ILTJM) di nengeri tu.
Ku Jisin, pengawa ngelakuka palan TVET enggau kus nya endang ba maya ke patut laban makit kereja beguna 60 peratus teknikal pengereja pengawa manggai ba taun 2020, dikena ngisi 1.5 million kereja baru.
