Penyampau orang ti nadai kereja di Sarawak kurang ari empat peratus

Datuk Seri Richard Riot - file pic

SERIAN, Mac 4: Sarawak diatu ngembuan 1.2 juta pengereja pengawa lalu penyampau orang ti nadai kereja urung 3.3 peratus dibanding 3.5 peratus penyampau ba renggat nasional, ku Menteri Pengatur Pengereja Pengawa Datuk Seri Richard Riot Jaem.

Ku iya, penyampau orang ke nadai kereja nya baruh ari empat peratus tau dianggap kitai nguna penuh pengereja pengawa lalu ba awak ke sama perintah nyendiaka mayuh bengkah inisiatif enggau program dikena muka pengawa puang ngagai raban ti begigaga pengawa.

Tu ku iya, nyengkaum ngatur karnival kerjaya ti diatur Opis Tenaga Kerja (JTK) ti merambu ngatur 10 karnival ke sebaka taun tu meri awak ngagai 13,000 iku ke ngiga kereja.

“Aku dipadah nyentuk Januari 2018, JTK Sarawak udah mujur meri kereja ngagai 1,099 iku ke ngiga kereja,” ku iya lebuh bejaku bejadi Jobfair@Serian 2018 di Dewan Mayuhguna Sekolah Jenis Kebangsaan (SJK) Chung Hua ditu kemari.

Ku Riot, kelimpah meri peluang ngiga kereja, perintah mega berat meri pelajar enggau latih teknikal sereta vokasional dikena nempa mayuh agi pengereja pengawa ke landik.

“Tu dikena nempa Malaysia nuju Tranformasi Nasional (TN50) jemah ila ti setipak enggau pinta Menteri Besai Datuk Seri Najib Tun Razak ti deka nambahka produktiviti, inovasi enggau pemansang ekonomi menua,” ku iya.

Riot madahka sebuah agi Institut Latih Industri (ILP) deka digaga di Sarawak enda lama agi ke nguna ungkus RM260 juta.

“Diaru Sarawak ngembuan 3 buah ILP iya nya di Kota Samarahan,Miri enggau Bintulu. Dikearapka nengah pengawa ngaga ILP th ulih nempa mayuh agi oengereja pengawa ke landik setipak enggau pinta makit kereja,” ku iya.

Bisi 20 iku pengaji muka 1,115 pengawa puang sama enggau ngemujurka Jobfair 2018 kemari nyengkaum bisi ngatur aktiviti interbiu, ngerejista ngiga kereja nengah online, licha pasal kereja, pemandang enggau servis meri lalau sentang pengereja pengawa. — DayakDaily