99 peratus manifesto di Parlimen Petra Jaya mujur dipejalaika

Datuk Seri Fadillah Yusof

KUCHING, Mac 4: Urung 99 peratus manifesto Barisan Nasional (BN) ungkup sitak Petra Jaya ba pengawa bepilih ke sebedau tu mujur dipejalaika, pia ku Kaban Parlimen nya Datuk Seri Fadillah Yusof.

Entara nya projek roundabout Abang Kipali Abang Akip enggau Jematan Emart ke diatu benung digaga.

“Baka nya mega projek Sepital Petra Jaya ke benung digaga taja pan kontraktor enda ulih nembu ba timpuh ke ditetap tang enti sida ngemeranka chara kereja ti konsisten ari sukut penyampau pekereja diatu, sepital nya ulih tembu ambis laun bulan Mac taun baru,” ku iya kemari.

Fadillah ke mega Menteri Kereja Raya madah munyi nya lebuh dikerandau pemberita ba program ‘Jualan Sentuhan Rakyat (PJSR)’ Parlimen Petra Jaya, ditu kemari.

Iya mega madahka diri nguji ngiga ungkup belanja dikena ngemanah Jalai Matang dalam sitak Kunsil Nengeri Tupong enggau pintu ai dikena nagang ampuh bah bemusim di DUN Semariang.


Nya entara dua pekara besai ke agi dalam perambu lalu kita deka nentuka kededua nya digaga.

Berebak enggau nya, Fadillah madah iya enggau raban oengawa bepilih paeti semampai udah sedia.

“Kami udah berengkah meri servis kenyau ari pengawa bepilih ke sebedau tu, iya pengudah aku nyadi pengari rayat lalu kami udah konsisten gawaka rayat sekumbang dalam timpuh nya,” ku iya.

Ngenang pasal PJSR Parlimen Petra Jaya, Fadillah madahka program nya diatur BN begulai enggau ejensi perintah enggau juluk mantu rayat mutarka tating pengidup sereta nerima sambut ke manah ari mensia mayuh ba parlimen nya.

“Nyadi pengari rayat tu mih chara aku mutarka sereta ngelempungka tating pengidup mensia mayuh. Kami deka ngatur siti agi program e sebaka di Matang kena Mac 17 tu ila,” ku iya. — DayakDaily