KLUANG, Julai 22: Penanggul kurang pengajar diatu majak balat nyadi di sekeda pasar besai menua tu kelebih agi di Johor enggau Selangor laban tebal agi ke gawa nya milih mulaika diri gawa ba negeri asal sida.
Menteri Pelajar Dr Maszlee Malik, suah agi sida mulaika diri gawa ngagai menua diri ketegal ungkus pengidup ke tinggi di pasar besai.
Kaban Parlimen Simpang Renggam madah munyi nya lebuh ditanya sekalika Johor enggau negeri bisi enanggul suntuk pengajar maya ke diatu pengudah Pengerami Bejadi sereta Nyuaka Setipikit Tembu Kereja Ngaga Sekula Repuk Fasa 1 Taun 2018 Negeri Johor di Sekula Kebangsaan Simpang Renggam sehari tu tadi.
“Penanggul nya nyadi di pasar besai baka di Johor Bahru, Pasir Gudang dan Shah Alam lalu opis menteri benung ngiga chaha ke pemadu manah ngambika pengajar enda ninggalka endur nya.
Engka bisi sekeda inisiatif deka dipejalaika nyengkaum nambahka elawin ungkus pengidup tauka ngemayuhka agi peranak kandang menua nya nyadi pengajar, tang semua nya agi ba renggat dipansik,” ku iya.
Sentang sekula repuk, Maszlee madahka sida bebendar agi nentuka sekula ke diberi projek digaga baru enggau diangkatmanah ditembuka lengkas.
Nitihka stastistik opis menteri mya ba taun 2017, bisi 120 sekula repuk dikelala di serata menua ke alai 60 buah ari nya di Semenanjung Malaysia lalu ke laluh nya 30 buah di Sabah enggau Sarawak.
Taja pia, nengah ungkup belanja ti disediaka perintah ba taun 2018, lebih ari 20 buah sekula nya udah tembu digaga baru tauka diangkat manah nengah renggat keterubah projek nya. — DayakDaily
