KUCHING. Dis 2: Institut Pematih Pengajar (IPG) Rajang enda patur ditutup laban nya ditutup kampus tunggal di Malaysia ti bisi ngajar program Ijazah Sarjana Muda Bahasa Iban.
Nyaalai, ngambika ulih chukup mekal pengajar ke landik dalam jaku Iban ba sekula di negeri tu, Opis Pelajar Sarawak dipinta nyeliahka kampus nya ari ditutup.
Kaban Kunsil Negeri (ADUN) Meradong, Datuk Ding Kuong Hiing madah, enti kampus nya ditutup nya deka ngemuntanka pengawa nempa pengajar ke landik ngajar subjek jaku Iban di sekula di negeri tu, ku iya lebuh bejuraika penemu ba Dewan Kunsil Negeri (DUN) empai lama udah.
Menteri, Datuk Seri Najib Tun Razak lebuh bejurai Bajet 2017 sebedau tu, merambu ngambika kampus IPG diubah nyadi Politeknik enggau Kolej Vokasional nyengkaum IPG Rajang.
Ku iya baru, kampus nya ngembuan perengkaguna ke chukup sereta staf ke landik mega diguna alai ngelatih stf perintah ari mayuh bengkah ejensi perintah kandang tengah menua Sarawak.
“Pemutus nutup IPG Rajang deka meri mayuh penanggul sereta empas negatif ke jemah ila,” ku iya. — DayakDaily
