Pemisi pemeranak puku ulih ngerembaika ekonomi ba sitak Batang Lupar

Dato' Sri Rohani Abdul Karim

PUSA, Mac 31: Pengulih sitak Parlimen Batang Lupar dikemansang nyadi palan ngemansutka pemakai udah matak pemeranak puku ba industri pemakai dipeda ulih ngerembaika ekonomi enggau pengawa ngaga jematan di Sungai Lupar, ku MP Batang Lupar Datuk Seri Rohani Abdul Karim.

Ku iya, tiga sitak Kunsil Negeri (DUN) dalam parlimen nya bisi penyelai laban ngembuan produk betanam betupi kediri baka DUN Sebuyau tebilang nyadi palan pengeluar buah enggau sayur, DUN Beting Maro palan perikanan enggau DUN Lingga palan bumai.

“Udah bisi pemeranak puku ti mandangka peneka beranakka puku ba aku dalam bidang betanam betupi ba sitak Parlimen Batang Lupar pengudah meda potensi sitak nya. Enti udah bisi pemwranak puku, ekonomi rayat di sitak tu deka majak manah.

“Tambah mega perintah benung merambu ngaga Jematan Batang Lupar ke pengelantang rayat ti ngemudahka proses ngeluarka produk betanam betupi ari sitak ru ngagai makit,” ku iya.

Rohani ti nyadi Menteri Pemansang Orang Indu, Ruang Bilik enggau Komuniti bajaku munyi nya lebuh ke dikerandau maya Program Touch Point Parlimen Batang Lupar di Masjid Darul Mualimin Kampung Tengah Maludam ditu.


Nampung baru pasal Jematan Batang Lupar, Rohani madahka projek ti dianggar beungkus RM1 bilion nengah ungkup belanja ari perintah besai enggau negeri nya deka meri penatai pemisi lebih ngagai peranak di sitak nya. — DayakDaily