KUCHING, April 14: Pengawa ngaga jematan nyambung ngagai jalai tebing pantai negeri Sarawak deka mantu ngangkatka ekonomi peranak Islam di kandang menua nya, ku Kepala Menteri Datuk Patinggi Abang Johari Tun Openg.
Entara jematan ke dalam perambu digaga perintah negeri baka Jematan Batang Lupar, Jematan Batang Saribas enggau Jematan Muasa Lassa.
“Kitai besampi ngambika dalam timpuh lapan taun semua perambu tu tembu magang, lebuh kandang menua tu dibuka, peranak di menua nya ulih ngena tanah pesaka sida ke lalu ngangkatka penatai pemisi sida,” ku iya.
Iya bejaku munyi nya lebuh bejadi Seminar ‘Pembangunan Ummah 2018’ ke diatur Majlis Islam Sarawak enggau Jabatan Agama Islam Sarawak di Dewan Majma Tuanku Abdul Halim Mu’adzam Shah, Kompleks Islam Sarawak, Kemari.
Ku iya, perintah negeri nadai kala bechiping ba pengawa baka ngaga jalai alun di menua pesisir. — DayakDaily
