KUCHING, 7 OKTOBER: Parti Bansa Dayak Sarawak Baru (PBDSB) netapka ulah Perintah Sarawak ti seruran begendangka pemansang sebengkah pekara ti enda betul.
Sekretari Besai PBDSB Julius Enchana madah, pemansang ukai pekara patut dipegendangka maya bepilih tang udah nyadi tanggungpengawa parti ke megai perintah.
“Sebarang parti ti menang lalu nguasa perintah nengeri sigi megai tanggung pengawa ngenataika pemansang ngagai rayat enggau menua,” ku iya ba ba siti penerang berita seharitu.
Ku Julius nambah, rayat udah meri pemenang ngagai parti ti megai perintah lalu manggaika pengarap ngagai sida ngenataika pemansang kelebih agi menua pesisir.
Berindik enggau nya, iya ngarap rayat enda tusut runding nyema bisi jaku madah semina perintah meri pemansang.
“Rayat mega anang nangi nukar perintah maya pengawa bepilih ke diatur lima taun sekali.
“Nya kebuah bisi pengawa bepilih ngambika rayat milih perintah nitihka atur demokrasi alai pekara tu mega enda salah,” ku Julius.
Iya ngarapka semua pengari rayat seruran ngabas kawasan sida lalu ukai semina datai meri projek semak adan deka bepilih aja. — DayakDaily
