Pemansang pelajar ba sitak DUN Layar dikemeratka — Rentap

Kaban Kunsil Nengeri Layar, Gerald Rentap Jabu bejaku lebuh ke bejadi Sesi Town Hall: Pemansang Pelajar DUN Layar di Dewan Datuk Stephen Kalong Ningkan Betong.

KUCHING, Okt 31: Pemansang enggau pemujur pelajar nembiak sekula dalam sitak Kunsil Negeri Layar amat dikemeratka.

Semua ke bekaul dipinta meri sukung penuh sereta besaup ngiring ngambika sekula tau nyadi institusi ke ngasi endur ngiri penemu sereta ulih nempa nembiak ke mujur dalam pelajar.

Ngambika juluk nya ulih nyadi nyata, Komiti Pemansang Pelajar ungkup sitak Kunsil Negeri Layar, deka ditumbuhka.

Gerald Rentap Jabu ke nyadi Kaban Kunsil Negeri (ADUN) Layar, bejaku munyi nya lebuh bejadi Sesi Town Hall: Pemansang Pelajar DUN Layar ti berambaika leka jaku “Pengasi Sekula, Pemujur Nembiak” ti diatur ba Dewan Lumba enggau Main Tan Sri Datuk Amar Stephen Kalong Ningkan, Betong ensana.

Ku Rentap, iya ti ngemunka langgur penemu numbuhka Komiti Pemansang Pelajar DUN Layar, deka netapka pelin besai ngambika pelajar ti ngasi agi ungkup bala nembiak ulih dipejalaika.

Nya mega ngambi ngemudahka pengawa ngaga perambu sereta nusun atur program enggau aktiviti dudi ila.

Tanggungpengawa semua nyengkaum pengari rayat, apai indai, komuniti enggau bala nembiak nya empu beguna amat ngambi ulih ngemujurka juluk nya, ku iya.

Program nya mega besai amat reti dikena nempa kerejasama entara bala ketuai sekula enggau ketuai raban bansa ngambika sama brsaup ngangkatka pemanah tikas pelajar enggau kurikulum ba bala nembiak sekula.

Sesi Town Hall nya ti keterubah endar diatur, udah ngangauka penatai urung 100 iku baka ketuai raban bansa di menua nya, PPD Betong, Pengetua, Kepala Pengajar enggau Penulung Kanan, pengari ari Gerempung Apai Indai enggau Pengajar (PIBG) sereta bala ke bukai.

Sesi pengelama urung tiga jam nya udah dipejalaika moderator Dr Keling Stevenson disaup bala panel bukai baka PPD Betong Supian Ekram, bala Pengetua enggau Kepala Pengajar sereta Residen Betong, Friday Belik.

Ngena awak nya mega, Rentap lalu nyuaka chek pemeri ari Sapit Kepala Menteri, Datuk Amar Douglas Uggah Embas sepenyampay RM215,000 ngagai 15 buah sekula engga duit turu PIBG. — DayakDaily