SRI AMAN, Julai 9: Bala pekebun mit di nengeri tu diperansang ngaul diri enggau aktiviti nanam lada dikena nambahka ekonomi sida berindik ari rega komoditi nya ti tinggi ba makit.
Ketuai Direktor Opis Kaunsil Lada Malaysia (MP) Dr Harry Entebang madah, industri lada iya nya entara industri ti meri pulai penguntung ke besai ngagai eksport menua ninting taun. Malaysia iya nya menua pemansut lada ti kelima besai ba dunya nangkan ke Vietnam, India, Indonesia enggau Brazil.
Ku iya, lada Malaysia iya nya entara ti manah di dunya ti kala dituku Komuniti Lada Anttarabansa (IPC).
“Ungkup lada chelum penyampau rega d makit iya nya RM9,900 se-tan lalu lada putih urung RM17,000 satu tan. Nya alai aku ngarap pekebun kitai di nengeri tu kelebih agi ba bagi menua Sri Aman tu deka ngambi awak tu belajarka chara nanam lada,” ku iya.
Iya madah munyi nya lebuh ti bejaku ba Majlis Ramah Tamah Aidilfitri enggau Ngiling Tikai ti bepalan di Rumah Joel Kion, Tanjung Bijat ditu, kemari.
Sama bisi datai iya nya ex-chalun Parti Keadilan Rakyat (PKR) Parlimen Sri Aman Norina Umoi Utot, Tr Joel Kion sereta 500 iku peranak di kandang menua nya.
Ku iya MPB deka sedia bekerejasama enggau perintah nengeri enggau besai dikena ngmansangka industri nanam lada di nengeri tu.
“Perintah nengah Opis Kaunsil Lada Malaysia deka nyendiaka agi belanja sereta mayuh macham skim bantuan ungkup bantu pekebun mit lada ngemunka pengawa nanam nya ngerembaika aktiviti betanam ke udah bisi.
“Tanggungpengawa MPB ukai semina ngemataka industri lada di menua tu, tang kami mega meri servis meri jaku lalau, bantu teknikal, pemansik kelimpah ngenegutka pengawa mansut enggau dagang.
“Kelimpah ari nya, kitai mega meri fokus ngagai mayuh produk ti nangkan ke nya kelebih agi ba pedagang mit enggau jelan pemesai dikena nambahka guna pengawa nanam lada,” ku iya.
Bekaul rega lada ti nurun, Dr Harry madah piak sida (MPB) udah bisi mekanisme kediri dikena mutarka pekara nya lalu diatu bekerejasama enggau perintah baru PH dikena ngadaka pengelikun rama ungkup nyaga pengelantang pendiau pekebun lada. — DayakDaily
