SIBU, Nov 12: Gerempung Nembiak Dayak Sarawak (PEBEDAS) nengah kerejasama enggau Kelab Sape Dayak Sibu (KSDS) deka ngatur ‘Festival Sape Belia Borneo (BYSF)’ kena Dis 2 tu ila ba Kampung Budaya 1Malaysia ditu.
Festival kereban muzik bansa Dayak ti keterubah diatur nya deka mantaika artis sape betikas entarabansa baka Jerry Kamit, At Adau, Desmond Emang, Saufi Aiman Yahya, Ilu Leto, Ferinandus Lah, Eugene Kuek, Julien Cottet Of France enggau Solomon Gau & Son.
Bela bisi enggau iya nya raban sape menua tu baka Ethnic Revolution, Jackery Chukan & Band, Borneo Spectrum, KSDS enggau The Collabration – Gendang Pampat.
“BYSF deka belabuh ari jam 9 pagi ngagai jam 12 tengah malam ke alai festival sehari nya penuh enggau bemacham aktiviti,” ku Presiden PEBEDAS ke lalu nyadi chairman pengatur (BYSF) Alexander Frederick Diglin ditu kemari.
Aktiviti ke bisi dipejalaika baka pemandang, nyual sape, woksyop, demonstrasi sape ditangkanka pekit bemain sape kategori beraban enggau solo lalu bayar nyeretai pekit iya nya RM100 enggau RM50.
“Kami mega benung nempa Malaysia Book Of Records (MBOR) ungkup gempuru bemain sape ke pemadu mayuh tengahari sehari nya” pia ku Frederick.
Nengah festival nya mega, PEBEDAS deka nguna sape dikena ngangkatka nama Sibu matak penatai temuai ari menua luar kia, sereta deka nyadika BYSF sebengkah pengerami renggat entarabansa ke diatur ninting taun.
Ku iya, muzik sape majak dikerindu rebak baru ari mayuh bengkah penatai.
Tiket tama meda BSYF dijual enggau rega RM48 ungkup orang besai tuai lalu RM15 ke nembiak ti baruh umur 15 taun.
Tiket tau ditanya ba Dalas Robert nengah lumur 013-8450934 tauka Jackery Chukan (019-8390839). — DayakDaily
