Pandelela bulih midul emas ba Pekit Terejun GP Fina, Australia


KUALA LUMPUR, Nov 12: Pandelela Rinong mujur bulih midul emas ba terejun platform individu indu 10 meter dalam Pekit Terejun Grand Prix Fina Australia ba Pusat Akuatik Gold Coast, Australia.

Indu bansa Bidayuh ari Bau, Sarawak nya mujur ngumpul 319.40 poin pengudah pusin ke lima ninggalka Celine Toth ari Kanada enggau Anna Rose Keating ari Australia ke ngujungka seduai bulih midul pirak enggau engkeraju.

Nya midul kedua dimenang Pandelela di Gold Coast pengudah bulih midul pirak bepasang enggau Leong Mun Yee ba terejun platform synchronise 10 meter indu ke alai seduai bulih 287.10 poin.

Siti agi midul pirak menua diulih Jellson Jabillin enggau Cheong Jun Hoong ke ngumpul 262.71 poin ba terejun platform synchronise 10 meter serentak. — DayakDaily