PDP deka ngenanka empat penuduk parti maya PRU14

BAUM: Robert (duduk tengah) begambar enggau raban Pampang Nembiak sepenemu baum.

MIRI: Aum Exco Pampang Nembiak Parti Progresif Demokratik (PDP) udah netapka parti nya nyukung Barisan Nasional (BN) lalu ngenanka penuduk sida ba Pengawa Bepilih Besai Ke14 tu ila.

Nengah strategi ke udah diatur sida deka ngenanka penuduk ba sitak Baram, Bintulu, Saratok enggau Mas Gading.

Aum ti betuaika Ketuai Pampang Nembiak PDP, Kaunsilor Robert Ayu, madahka sida nyukung sebarang pemutus parti nyema nadai nukar chalun ba sitak Baram, Bintulu enggau Mas Gading, kelimpah Saratok.

“ Sebarang pemutus ti digaga ketuai parti sentang chalun ke bisi pontensial ngenanka penuduk nya deka disukung,” ku Robert.

“Kami bisi chara ngenaka ngenanka semua penuduk nya lalu pechayaka chalun ke dipilih ngenanka sitak Bintulu, Baram enggau Mas Gading,” ku iya baru.


Berebak enggau nya Ketuai pengerembai berita, Jaya Ramba madahka Pengerami Makai Lemai Pampang Nembiak PDP Renggat Nengeri deka diatur kena Jan 6 taun baru.

Iya mega melabaka pengerami nya deka digulu urung 1500 iku ari Pampang Nembiak enggau Indu serata nengeri.