PBK sengapa nuduh, GPS seruran meratka pemansang di menua pesisir — Alexander Nanta

Datuk Alexander Nanta Linggi

Dikarang Chris Bishop

KUCHING, Jun 10: Sekretari Besai Gabungan Parti Sarawak (GPS) Datuk Alexander Nanta Linggi nyangkal tuduh ketuai dalam Parti Bumi Kenyalang (PBK) ti madah GPS enda meratka pengawa nyendia perengka guna di menua pesisir.

Ku iya, tuduh ari parti politik ke baru ditumbuh nya digaga sengapa aja, ti enggau tuju ngulihka sukung rayat.

“Barang aja parti politik baikka nya ke baru tauka lama nyengkaum PBK ke nuduh GPS enda meratka rayat di menua peisir, nya semina tuduh sengapa.

“Peratika pemansang ke udah nyadi di serata Sarawak, kenyau kitai merintah iya nya ari sida ketuai ke dulu nyentuk ngagai ketuai ke diatu.

“Perintah Negeri(diatu) ti betuaika Kepala Menteri Datuk Patinggi Abang Johari Tun Openg meratka atur ngemansang menua pesisir,” ku iya.

Nanta mansutka jaku nya ngagai pemberita ba pengerami ngelalu pengabang ke diatur Adun Tanjung Datu, Datuk Amar Jamilah Anu di Santubong ditu, malam tadi.

Iya ke mega Kaban Parlimen (MP) Kapit nambah, kenyau mangku pengawa kepala menteri, Abang Johari udah numbuhka sekeda ijinsi pemansang kandang menua di serata Sarawak.

Nengah Ijinsi Pemansang Ulu Rajang (URDA) ku Nanta, belanja penyampau RM1.5 biliun udah dikemendar Abang Johari lalu deka dipelanja ba pengawa pemansang dalam timpuh 2 taun.

“Diatu mayuh projek pemansang perengka guna benung digaga alai projek ke bukai udah dipansutka tinda ngambi tau berengkah digaga dalam timpuh 2 taun.

“Pia mega ba kandang endur bukai baka ke di Bario enggau Baram nengah Ijinsi Pemansang Kandang Tanah Tinggi (HDA) ti megai tanggungpengawa ngelengkas pemansang perengka guna sereta ngangkatka sosio ekonomi peranak ke diau ngelingi,” ku iya.

Ngenang kaul ke sama, Nanta madah ijinsi pemansang mega ditumbuh di kandang endur tunga utara Sarawak iya nya di Limbang enggau Lawas.

Zon tengan Sarawak iya nya di Sarikei, Betong enggau Sri Aman ku iya diangkat nyadi palan pemansut pemakai alai dagang agro deka dikerembai enggau chakah agi.

“Kitai mega ninga raban bansa Bidayuh minta ditumbuhka Ijinsi Pemansang Kandang Tunga Selatan (SDA) ngambi ulih meratka aktiviti sosio ekonomi rayat ke diau ngelingi.

“Semua tu mandangka Kepala menteri meratka pemansang di menua pesisir alai mayuh duit udah lalu deka dipelanja alai semua belanja tu deka nyadi ‘game changer’ dikena ngemansang menua pesisir,” ku iya.

Berindik enggau nya ku iya nambah, GPS enda kiruhka tuduh ke baka nya ketegal GPS sigi amat bisi ngaga kereja.

Kepala menteri begulai enggau kabinet sereta bala Adun GPS chukup regas ngintu sitak diri alai ba aum DUN pan sida seruran bejaku sentang atur pemansang ungkup pemaik rayat, tandu Nanta. — DayakDaily