Nanta: Gambar nya diambi di Papua New Guinea, ukai di Kapit

Nanta bejaku ngagai pemberita di Kuching malam tadi.

Dikarang Chris Bishop

KUCHING, Jun 10: Kaban Parlimen (MP) Kapit, Datuk Alexander Nanta Linggi ngelalau mensia mayuh ngambika enda mudah pechaya enggau sekeda tuduh bejai Perintah Negeri ke ayan ba media rama.

Ku iya, tuduh nya mai niat ke enda manah ngambika rayat begedika Perintah Negeri, Gabungan Parti Sarawak (GPS).

Sekretari Besai GPS nya nusuika tuduh siku orang nengah siti gambar ke ayan ba Facebook enggau WhatsApp ti mandangka sekeda raban orang ti pulai gawai betengahka jalai di balat jai ke ditulis iya di Kapit.

“Tuduh nya balat dikerembai di media rama baka ke Facebook enggau WhatsApp. Aku meda gambar nya enggau silik alai sigi amat ukai di menua kitai di Sarawak ditu.

“Aku mega dipadah diak orang ti ngerembaika gambar, iya nya siku orang ke suah ngarang berita ba surat kabar udah ngakun diri salah.

“Gambar nya diambi di Papua New Guinea, jauh ari Kapit lalu jauh mega ari Sarawak,” ku Nanta.

Iya mansutka jaku nya ngagai pemberita ba pengerami ngelalu pengabang Hari Raya Aidilfitri ke diatur Kaban Kunsil Negeri (Adun) Tanjung Datu, Datuk Amar Jamilah Anu di Santubong ditu, malam tadi.

Tuduh sengapa: Gambar ti mandangka jalai jai di Papua New Guinea, dipadah di Kapit.

Nanta nyempulang penemuai ngabang Kepala Menteri Datuk Patinggi Abang Johari Tun Openg.

Ngenang kaul ke sama, Nanta madah tuduh ke baka nya nyadi siti cara ke mudah dikena bejaika GPS.

Iya mega beambika siti tuduh ke sama ke nyadi dulu agi ari tu alai gambar nembiak sekula niti jematan repuk endur sida nuju ke sekula dikerembai ba media rama.

“Nengah gambar nya sekeda orang nguji deka bejaika perintah, baka ke perintah enda meratka pengelikun bala nembiak di menua pesisir.

“Enti diperatika enggau silik gambar nya, pekayan sekula nembiak nya ukai pekayan nembiak kitai ditu tang pekayan sekula nembiak menua bukai.

“Tu siti agi berita bebula, orang ti enda rinduka kitai sigi deka ngereja pengawa baka tu,” ku iya. — DayakDaily