KUCHING, Ogos 26: Ketuai Nembiak Parti Bansa Dayak Sarawak Baru (PBDSB) Rapelson Richard Hamit nyambut manah atur perintah negeri ti setuju ngemendarka Kort Anak Negeri Sarawak (Kort Dayak) negika autonomi sereta nadai tatak ngambika ngembuan bungkur ke besai agi sebaka enggau Kort Sivil enggau Syariah.
“Tu singkang keterubah nuju pengawa ngaku bansa asal Dayak ba renggat nasional enggau entarabansa,” ku Rapelson ba sebengkah penerang kemari.
Kepala Menteri Datuk Abang Johari Tun Openg ngelalau raban Kort Anak Negeri Sarawak, ti deka betuaika Ketuai Pengerejister Datu Michael Dawi Alli ngambi numbuhka siti komiti sereta bejalaika pansik silik sebedau mantaika perambu nya ngagai perintah negeri.
“Tu berita manah laban perintah negeri pengujung iya ngamatka semaya. Kami dalam (PBDSB) udah lama negika nya lalu tu bisi dalam manifesto kami maya Pengawa Bepilih Besai ke-14 ngambika Kort Anak Negeri (Kort Dayak) diduduk sama peninggi enggau setara kort Sivil sereta Syariah.”
Rapelson mega mantaika langgur penemu ngambika Majlis Adat Istiadat Bumiputera diganti enggau Majlis Adat Istiadat Dayak lalu Kort Bumiputera diganti enggau Kort Dayak. — DayakDaily
