Jalai Besai Kedua sigi dikingin rayat di Saratok, Betong enggau Banting

Bell Bernard Aggan

“This article is a translation of Second Trunk Road the dream of many in Betong, Saratok and Banting originally published on August 25, 2018.”

KUCHING, August 26: Perambu ngaga Jalai Besai Kedua sigi lama udah dianti urung 122,220 iku rayat ari Betong enggau Saratok sereta 5,000 iku agi ari Banting (pasar semak Sri Aman) pengelama betaun ke udah, pia ku Kaban Kaunsil Besai Parti Bumiputera Bersatu (PBB), Bell Agan.

Ku iya, jalai besai kedua nya deka nyambung pasar Sri Aman ngagai Sibu, Betong enggau Saratok, lalu tu nyendiaka sambung jalai ti beguna amat ngagai rayat.

“Kami gagit amat ati ninga perambu ngaga Jalai Besai Kedua nya. Nya kebuah kami nyukung Kepala Menteri Datuk Patinggi Abang Johari Tun Openg, tiga iku sapit iya; Datuk Amar Douglas Uggah Embas, Tan Sri Dr James Masing enggau Datuk Amar Awang Tengah Ali Hasan, enggau semua kabinet menteri Negeri Sarawak laban ti merenung jauh deka nyendiaka sambung jalai nya ngagai orang ti pemadj begunaka nya,” pia ku Bell.

Perambu ngaga jalai besai kedua nya inisiatif perintah negeri ke beungkus entara RM4 bilion ngagai RM6 bilion. Nya meri jalai alternatif entara Kuching, Simunjan, Sri Aman, Betong lalu ke Sibu. Nya deka ngurangka timpuh pejalai diatu ti beguna tujuh jam ari Kuching ke Sibu ambis nadai 90 minit.


Bell ke mega mandal chairman PBB Krian mega pechaya perambu ngaga jalai nya deka meri ‘rega ngagai duit’ laban nya deka muka mayuh agi tanah adat bansa asal (NCR) sereta ngerembaika peluang ekonomi ngagai rayat ditu.

“Kandang menua ti diatu, enda digaga akses jalai, lalu peluang ngambika produktif agi ba ekonomi mega ditutup laban sida enda ulih muka tanah NCR sida ke besai ngambika dikemansang sechara komersil,” ku iya.

Sentang perambu See Chee How, pemesai khas Opis Menteri Kereja Raya, ti mantah perambu ngaga jalai besai kedua, Bell madahka See enda nemu nya meri pemaik ngagai rayat.

“Enti perambu nya dikinsil, rayat deka majak tinggal di belakang. Nambahka nya, maya deka nyambung elekterik enggau ai ngagai palan pengentap dia enti nadai sambung jalai,” ku Bell.

Iya arapka See ke mega Kaban Kunsil Negeri Batu Lintang, anang mantah projek nya tang iya patut nguji ngiga belanja ke mayuh agi ari perintah besai dikena ngaga projek nya enggau inisiatif infrastruktur ke bukai di negeri tu.

Berebak enggau nya, MP Sri Aman Datuk Masir Kujat madahka urung 5,000 iku ari semilan rumah panjai di Banting ngelama tu nengah jalai sungai nurin ngagai pasar ke pemadu semak baka Lingga enggau Sri Aman.

Ku iya, perambu ngaga jalai besai kedua nya ke bendar deka muka pemansang ba kandang menua nya. — DayakDaily