KUCHING, Julai 27: Atur Lembaga Lada Malaysia (LLM) ti udah ngetuka sementara pengawa meli lada meri empas ke besai ba penatai pemisi orang bekebun lada.
Presiden Parti Bansa Dayak Sarawak (PBDS) Baru, Bobby William, madah LLM patut meri kebuah ke nyemetak ti ngujungka atur nya dikena.
“Lapa diketuka sementara enggau nadai kebuah ti nyemetak?
“Tajapan diketu, semua nemu diak majoriti orang bekebun di menua pesisir sigi bansa Dayak alai pengidup sida bepanggai enggau asil lada,” ku iya.
Tambah Bobby, belanja beridup ninting hari dipegai perintah Pakatan Harapan patut meri pengelantang ngagai rayat, munyika semaya sebedau pengawa bepilih besai ke udah.
Tang pengudah setaun ku iya, mayuh rega komoditi baka ke sawit labuh lalu diatu rega lada pan majak nurun.
“Gaya ekonomi maya ke diatu pan udah enda tentu lalu tu ngasuh rayat kelebih agi orang bekebun di menua pesisir merinsa agi,” ku iya.
Bobby ti kala gawa ba LLM pengelama 17 tahun ari taun 1990 nyentuk ngagai 2007, madah atur tu enda kala digaga LLM ngelama ke udah.
Ku iya nambah, atur nya mandangka LLM enda nemu ngemujur program ti ulih mantu orang bekebun lada di Sarawak alai pengawa nya tebal agi dikereja bansa dayak.
“Enti lada udah kelalu mayuh, nama kebuah lada ke dijual ba pasar mengkang mar?
“Retinya, perintah ke diatu nadai strateji ke manah dikena ngelakuka lada. Empas ari atur tu diasai rayat kelebih agi orang bekebun lada. Sekalika sida deka diberi bantu duit tauka sabsidi bukai?” tanya Bobby.
Kelimpah ari nya, iya mega madah orang tengah ngambi untung kelalu mayuh lalu ngujungka rega lada balat nurun.
Ngenang kaul ke sama, Bobby madah program mantu ngangkatka ikas pengidup rayat di menua pesisir enda nempa asil ke dikearap.
“Enti nadai asil, retinya program semina bebasauka duit rayat. Sekalika bisi pengilap ba tusun pengawa LLM,” ku iya.
Berindik enggau nya, iya minta perintah mutarka pemar tu enggau lengkas. — DayakDaily.
