Pasar Malam Debak nyaup ngangkatka ekonomi peranak menua nya

A night market scene. — DayakDaily.com file pic. // Photo: Pixabay

DEBAK: Pengawa ngatur Pasar Malam Debak siti ari chara ke pemadu manah dikena mantu peranak menua nya nambahka penatai pemisi sereta nherembaika aktiviti ekonomi orang dagang di menua nya.

Ku Kaban Kunsil Nengeri (ADUN) N35 Saribas, Pasar Malam Debak ke diatur ba Dataran Terminal Bas Lama diperambu nyadi aktiviti ninting bulan ngambika pasar Debak tau nyadi palan endur ngerembaika pusat aktiviti rama main enggau adat sereta mega nyadi pengepun dikena ngerembaika aktiviti dagang peranak di menua nya.

“Pengerami ke diatur minggu tu ti kedua kali pengudah bulan siti nyin tadi.

“Nitihka perambu, Pasar Malam Debak deka diatur pengelama tiga hari ba minggu minggu ke penudi ninting bulan ke alai ditagit nerima penatai urung 1,000p iku ninting malam.

“Tang minggu tu deka diatur ngelama lima hari beserimbai enggau Pengerami Gerempung Lumba enggau Main sereta Adat enggai Asal Opis Pelajar Ke-37 di Betong ke nguna Pasar Debak nyadi palan ungkup main sepak takraw enggau futsal veteran,” ku iya.


Razi nesau mensia mayuh ke diau ngelingi Debak datai sampal ngerami program nya.

“Orang dagang menua nya patut ngena peluang tu nambahka peneleba kelebih agi penatai pemisi sida, ku iya.

Razi mega meransang raban orang dagang mit nguna awak nya nyadika pelasar dikena ngangkatka ekonomi enggau tikas pengidup sida.

Kelimpah ari penatai artis menua tu, mayuh bengkah pekit bisi diatur baka karaoke lagu peneka ati diri, karaoke lagu 60-an, ratu kebaya, fesyen nembiak, mit, betanda enggau bebatak tali.

Pasar Malam Debak ti diatur Serakup Pedaja enggau Orang Dagang Debak besaup enggau Palan Servis DUN Saribas, Majlis Daerah Debak sereta Lembaga Pemasaran Pertanian Persekutuan (FAMA) bisi nyendiaka 30 buah kanopi ke guna pedagang ba pasar malam nya.