NRE benung mansik pemansut ai ari baruh tanah menua

Ministry of Natural Resources and Environment logo.

IPOH: Opis Mineral enggau Geosains benung ngelala pemansut ai baruh tanah di serata menua Malaysia ngambika kurang bepanggai ba sistem bekal ai ke bisi diatu.

Sapit Menteri Pengeraja Asal enggau Rampa Menua, Datuk Ir Dr Hamim Samuri madah dianggarka bisi lima trilion meter padu pemasut ai baruh tanah di serata menua diatu.

“Pansik benung digaga pakar ti mungkur sekeda pekara nyengkaum pemansut ai nya dikeirauka enti kelalu mayuh tau ngenataika sekeda penanggul baka tanah tekerap enggau ngamahka ai.

“Projek perintis telaga eksplorasi nya digaga di Sekula Sekondari Sains Bagan Datuk (SABDA) dikena ngelala pengulih ai baruh tanah ba kandang endur nya,” ku iya madah ngagai pemberita.

Iya bejaku munyi nya lebuh bejadi Simposium Mineral (SIMPOMIN) Ke-8 enggau Aum Opis Mineral enggau Geosains, ditu, empai lama udah.


Pengawa dua taun sekali diatur kenyau ari yang taun 2002 lalu keterubah digulu lapan iku pengari ari menua ASEAN nyengkaum Filipina, Thailand, Kemboja enggau Laos.

Pengari ASEAN ke enggau ba atur pengawa nya endang sebagi ari aktiviti ti dirintai ari baruh Pelan Tindakan Kerjasama Mineral ASEAN (AMCAP) III (2016-2020).

Hamim madah, asil peresa ba telaga di SABDA mandangka kuantiti pemansut enggau kualiti ai ke manah.

“Penalam telaga nya 135 meter, ulih ngemansut urung 4.5 juta liter sehari, lalu semua penyampau ‘larutan pepejal’ (TDS) di makmal mandangka nya manah nyadi pemansut ai mata,” ku iya.