BETONG, Julai 23: Pasar lama Betong ke mega entara lumpung kedai keterubah di pasar tu udah angus urung pukul 10 pagi tu tadi.
Penusah angus nya nyadi ba siti lawang kedai ke besemak enggau mini stadium ditu.
Penulung Direktor Operasi Bomba enggau Penyelamat negeri, Tiong Ling Hii madah, api dipechaya nyadi ba kedai keterubah sebedau nyerarai ngagai kedai sepiak.
Raban ari Balai Bomba enggau Penyelamat Betong sereta Saratok udah dianjung ngagai palan nya ngambika ngerara api.
“Bomba ngaga ‘fire break’ ba ringkat dua kedai keempat nengah chara mabak atap ngambika api nya enda nyerarai ngagai lumpung kedai bukai.
“Empat buah kedai angus ambis, dua kedai agi iya nya kelima enggau keenam mujur diselamatka,” ku iya.
Operasi ngerara nya mungkur 22 iku ari dua balai nya kelimpah sekeda ejensi bukai nyengkaum polis, SESCO, Angkatan Pertahanan Awam Malaysia (APM)) enggau Tim Bomba volunteer (PBS) Betong.
Naka ke diatu, nadai penusah bebadi nya diriput ba penusah angus nya.
Kebuah angus mega agi dipansik tim forensik penusah angus, ku iya. — DayakDaily
