SIBU, Ogos 6: Sebengkah pansik deka dipejalai dikena nentu sekalika Sarawak begunaka Ordinan Pelajar ngambika perintah bagi negeri ngelangkar sereta bejalaika polisi pelajar nya kediri jemah ila.
Menteri Muda Pelajar enggau Pansik Teknologi, Dr Annuar Rapa’ee madahka pansik nya beguna amat laban pekara pelajar ngelama tu ari baruh bidang kuasa perintah besai.
Ku iya, ordinan nya deka meri kuasa kngagai Opis Menteri Pelajar Sarawak ngambika ngelangkar polisi pelajar ke bisi diatu ti bekaul enggau guna sereta pemerat Sarawak ke benung nuju ngagai industrilisasi.
Iya bejaku munyi iya ngagai pemberita pengudah bejadi ‘Klinik Latihan Intensif Kecemerlangan (KLIK) SPM 2018’ di Universiti Kolej Teknologi Sarawak (UCTS), ditu kemari.
Bisi 250 iku nembiak sekula sekondari dalam sitak Kunsil Negeri (DUN) Nangka masuk latih pengelama 10 minggu nya.
KLIK diatur Gerempung Graduate Bumiputera Sibu bekerejasa enggau Palan Servis DUN Nangka sereta UCTS, ti masuk taun kelima udah dipejalaika. — DayakDaily
