KUCHING, Jun 28: Pampang Indu Parti Pesaka Bumiputera Bersatu (PBB) deka nyadi jematan peneguh integrasi entara perintah negeri enggau perintah besai.
Datuk Seri Fatimah Abdullah, madahka pampang nya deka nempa kaul ke tegap enggau parti Pakatan Harapan ngambika ulih negika rayat.
“Kami mega deka nentuka rayat ba renggat baruh nerima perintah baru ke diatu lalu mereti kuing sida ba pengawa nempa Malaysia Baru,” ku iya.
Ba awak ke sama ku iya, Menteri Pengelantang Pendiau Komuniti, Orang Indu enggau Nembiak Mit mega dekaka perintah besai meri garus lalau ke nyata ngagai staf perintah besai di negeri tu, dikena nentuka pengereja pengawa perintah besai enggau negeri di Sarawak sama ba polisi ke sebaka.
“Kami dekaka penyilik nama ti tau enggau enda tau ba pengereja perintah perintah besai di negeri tu.
“Kami dekaka sida nerima perintah gawa ke betul, sama baka pengereja pengawa negeri,” ku iya lebuh dikerandau pemberita pengudah aum betambit pintu Pampang Indu PBB di rumah iya.
Aum nya mega berandauka kuing pampang nya ari baruh GPS.
Menteri Muda Undang-undang, Kaul Perintah Besai-Negeri enggau Ngemata Projek, Sharifah Hasidah Sayeed Aman Ghazali, Kaban Kunsil Negeri (ADUN) Tanjong Datu, Datuk Jamilah Anu mega bisi datai maya nya. — DayakDaily
