KUCHING, Feb 13: Institusi Pembangunan Penyelidikan Pertanian Malaysia (MARDI) majak ngasilka padi bansa baru lalu diatu udah ngepunka projek nanam padi Warna 98 tauka MRQ98 ba skim parit enggau entali ai di Skuduk/ Chupak, ke mungkur pemesai 4.4 hektar.
Sapit Kepala Menteri Datuk Amar Douglas Uggah Embas nengah teks jaku iya dibacha Menteri Muda Pemansang Tanah Adat Datuk Roland Sagah madah, padi MRQ98 ulih ngemansutka asil urung 4.5 ngagai 6.7 tan sehektar.
Dalam mesej iya maya mantaika pada MRQ98 Kampung Plaman Payang di Serian kena Hari Satu, Uggah ke mega Menteri Betanam Betupi Moden, Tanah Adat enggau Pemansang Kandang Menua madah, pengawa nanam MRQ98 ulih mantu nyungkak asil enggau penatai pemisi orang bumai.
Kelimpah tan ari penyakit, MRQ98 timpuh padi nya tuai bisi pandak agi iya nya 103 hari sereta engkeman ungkup pelin nanam dua kali setaun.
Beratika MRQ98 manah kualiti ke eksport sereta ulih dikena ngasil produk ke bukai baka tepung dikena ngaga biskut, kek enggau pemakai anak mit, pengawa nanam nya deka dikerembai ngagai kandang endur bukai di negeri tu. — DayakDaily
