Padahka bagi sitak menua pesisir di Sarawak ti enggaika projek pemansang – Karim

Datuk Abdul Karim Rahman Hamzah

KUCHING, Ogos 25: Penerang ti dipansutka Menteri Pemansang Menua Pesisir, Rina Harun, ti madahka bisi sekeda peranak di menua pesisir enggaika jematan digaga baka reti mandangka peranak di menua pesisir Sarawak enggaika projek pemansang.

Menteri Dagang Temuai, Seni, Main Asal, Nembiak Lumba enggau Main Belia, Datuk Abdul Karim Rahman Hamzah arapka penemu ke baka nya ukai semina dikena ngiga publisiti tauk ngenadaika mayuh agi projek pemansang digaga di Sarawak.

“Padahka sitak ni ke udah alai iya nemuai di Sarawak lalu sitak ni ti enggaika projek pemansang,” ku iya.

Ngaku diri tekenyit ninga penerang menteri perintah Pakatan Harapan nya, Abdul Karim gaga ati enti Rina ulih mantaika penerang silik sentang projek ti dipadahka iya nya.

Nitihka media, Rina madah lebuh ke ngabas projek jematan nya, mayuh rayat menua pesisir enda begunaka infrastruktur nya. — DayakDaily