Operasi munas rabies deka dikemalatka agi – Uggah

Datuk Amar Douglas Uggah Embas

KUCHING, Ogos 25: Operasi munas rabies di Sarawak deka dikemalatka agi nengah operasi nangkap sereta munas ukui lepas enggau vaksinasi, ku Sapit Kepala Menteri Datuk Amar Douglas Uggah Embas.

Uggah, ke mega Chairman Komiti Mutar Penusah Ngenyit Negeri Sarawak, madahka siti  operasi bebegulai nangkap, munas uke be bekesegau nyengkaum ke bisi kolar belisin enggau ke nadai lisin ti deka dipejalaika Majlis Bandaraya Kuching Selatan (MBKS) enggau Opis Sevis Jabatan Veterinar Sarawak di Tabuan Jaya, Tabuan Tranquility, Stutong, BDC, Tabuan Heights, Stampin enggau Hakka Avenue berengkah Sept 1-30 tu.

Kelimpah meri vaksin nengah chara ke besai ngagai ukui deka dipejalaika di Dewan Mensia  Mayuh MBKS kena 25 Ogos berengkah pukul 10 pagi nyentuk 2 ngalihari, ku iya ba sebengkah penerang ditu.

Ku iya, kaunter alai ngerejister lisin ukui ba opis bekuasa menua mega deka disediaka.Iya mega ngelalau mensia mayuh ngambika enda nejuka ukui lepas tauka mai ukui pansuk ari kandang endur ke bisi penyakit, rabies enti nadai pemendar betulis ari Opis Servis Veterinar negeri.

Orang ti enda ngasika jaku tangkan nya deka diukum mata duit nyentuk RM5,000 tauka dijil enda ngelui ari tiga bulan tauka kedua-dua nya enti ditemu salah.


Dikena nyaga pejalai ukui lepas dalam kandang endur ke bisi igi penyakit, perintah negeri deka minta bantu ari Polis Diraja Malaysia, Soldadu Malaysia, Pasukan Gerakan Am Sarawak enggau Opis Perengka Pengangkut Jalai, ku iya.

Uggah mega minta pengempu ukui dalam kandang endur ke bisi igi penyakit nentuka jelu tupi sida dituchuk ngena vaksin anti-rabies. — DayakDaily