Orang politik dipinta begempung mutarka isu MA63, SAPA

Peter (kanan) bejaku rambau gempuru likun SAPA di Padang Merdeka di Kuching.

Oleh Chris Bishop

KUCHING, April 28: Sarawak Association for Peoples’s Aspiration (SAPA) seharitu ngadu gempuru likun di Padang Merdeka ditu.

Nitihka penerang jurujaku SAPA, Peter John Jaban gempuru diatur enggau tuju ngansak Perintah Sarawak ngadu mosyen bejuraika ubah Genteran 1(2) Konstitusyen Federal ba Aum Dewan Undangan Negeri(DUN) ti berengkah April 29.

“SAPA ngasai mayuh peranak Sarawak minta bala orang politik badu besalahka pangan diri.

“Sida dipinta begempung sereta ngiga jalai mutarka isu ke bekait enggau Sempekat Malaysia 1963 (MA63),”ku Peter bejaku ngagai media.

SAPA mega ku Peter nambah dekaka DUN nyerenih sekeda pekara berat ke bekait lalu ngiga jalai mutar ungkup pemaik nembiak rebak baru.

Entara pekara berat ku Peter iya nya sentang kuasa otonomi ba imigresen, Akta Pemansang Petroleum 1974 (PDA74) enggau ‘Territorial Sea Act 2012’.

“Meratika baru pansik ke digaga United Nations (UN) ba asai ati peranak Sarawak sentang atur numbuhka Federasyen Malaysia.

“Meratika ubah ke udah digaga ba sentang penyampau pengari ba parlimen. Ba taun 1963 Malaya enda megai majoriti dua pertiga ari semua penyampau kaban parlimen tang diatu sida udah ngelui dua pertiga.

“Ke penudi, SAPA minta DUN Sarawak ngaga perambu ubah Konstitusyen Federal ke betul ti bepelasarka MA63 sereta ngakun Sarawak sebengkah Negara lalu ukai Negeri,” ku Peter.

Gempuru ke diatur berengkah jam 4 nyentuk ngagai 6 lemai nya digulu lebih 100 iku kaban SAPA enggau bala penyukung bukai. — DayakDaily