Nusuk marik, ari pengerindu nyadi pengawa dagang

Tr Sangi (tengah) ba bangsal bejual produk marik Gawai Bazaar SDNU di Palan Kristian Ekumunikel.

Dikarang Chris Bishop

KUCHING, Mei 21: Bepun ari pengerindu dikena ngisi maya lepa di rumah, produk marik ari asil pengelandik jari Tr Kampung Kudei Iban, Sangi Abu di jual ngelingi Mengeri Kuching.

Dikerandau ba Bazaar Gawai Sarawak Dayak National Association (SDNU) 2019 seharitu, Tr Sangi madah asil ari bejual marik nya ngenataika pemisi tambah ngagai sida sebilik.

Ku iya, asal nusuk marik semina dikena ngisi maya lepa di rumah tang pengudah meretika mayuh pinta ba makit, pengawa nya lalu nyadi dagang.

“Nitihka singkang sida ke bukai, produk marik aku dikelaku nengah media sosial baka ke Facebook enggau Instagram.

“Kelimpah ari nya, aku seruran ngambi bagi ba pengawa bejual tauka karnival kraf ke bisi diatur di Kuching,” ku iya.

Sekeda ari produk marik S.J Bajik Enterprise.
Sekeda ari produk marik S.J Bajik Enterprise.

Gawai Bazaar SDNU di Palan Kristian Ekumunikel (CEC) berengkah Mei 19-24 lalu dibuka ari jam 10 pagi nyentuk ngagai 11 malam.

Penyampau 74 bangsal bejual pemakai, ai irup, kuih tradisyenal Dayak, asil ari pengelandik jari, pekayan, perengka ngias tubuh, studio pantak enggau karaoke bisi dibuka ngagai mensia mayuh.

Tr Sangi madah karnival kraf matak semua raban orang ke ngasilkan produk ari pengelandik jari ari selampur Sarawak.

Ku iya, karnival ke baka nya nyadi siti chara perintah nyaup nambah penatai pemisi orang dagang kraf.

“Ambika banding, karnival kraf ke diatur di Waterfront Kuching matak beribu temuai ari dalam enggau luar menua datai.

“Temuai ari Semenanjung Malaysia enggau ari menua luar sigi rinduka perengka ngepan tradisyenal kitai Dayak,” ku Tr Sangi.

Nitihka penerang Tr Sangi, dalam timpuh seminggu karnival kraf di Waterfront Kuching, orang dagang kraf tau bulih untung urung RM2,000 nyentuk ngagai RM3,000.

Entara produk marik ke bisi digaga Tr Sangi iya nya marik kabo, sanggu moden, gelang jari sereta kaki enggau antin.

Produk marik Tr Sangi dikelaku nengah kompeni S.J Bajik Enterprise. — DayakDaily