Sarawak ngarap diberi ungkup ke besai ari Bajet 2018

Datuk Seri Wong Soon Koh

KUCHING: Sarawak ngarapka nerima ungkup belanja ke besai agi kelebih agi ba projek menua pesisir dalam Bajet 2018 ti deka dipejuraika Menteri Datuk Seri Najib Tun Razak kena 27 Oktober tu.

Menteri Pekara Wang Kedua Dato Sri Wong Soon Koh madah, Sarawak beguna mayuh agi belanja dikena ngenyukupka bekal ai enggau elektrik.

“Aku pechaya Bajet 2018 siti bajet ke manah lalu meri mayuh agi agih belanja ke Sarawak dikena ngemansangka menua pesisir” ku iya.

Wong mega deka meda mayuh agi agih belanja dikena ngaga jalai alun enggau jematan di semanjai jalai tebing pantai nengeri tu.

Ku iya, perintah nengeri deka majak ngaga jalai tebing pantai ti udah dikemendarka kabinet perintah besai.


“Nya begunaka mayuh agi pengawa ngaga jematan dikena nyambung jalai nya,” ku iya.

Wong mega madah, perintah besai patut nyendiaka mayuh agi ungkup belanja dikena ngaga Pan Borneo Highway ngambika ulih ditembu ba timpuh ke ditetap.

Berebak enggau nya, iya ke mega Menteri Dagang Entarabansa enggau E-Dagang nyukung jangka dalam ripot RHB empai lama ti nyebut Bajet 2018 dipelaba deka mantaika chukai e-dagang.

“Aku ngasaika nya endang patut laban mayuh transaksi ti dipejalaika nengah e-dagang kekadang enda ditemu lalu tu ulih nyaga ngambika orang ti ngulihka penguntung nengah e-dagang mayar chukai ke penatai pemisi sida,” ku iya.