KAPIT, Mei 5: Menteri Perengkaguna Mensia Mayuh, Datuk Stephen Rundi Utom madahka penyandang sitak Kapit, Datuk Alexander Nanta Linggi deka diangkat nyadi menteri penuh di Putrajaya pengudah PRU14.
“Kitai meseti nentuka menang majoriti besai ba pengawa bepilih besai tu,” ku iya lebuh bejaku ba Pengerami Ketuai Begulai enggau Rayat ke diatur ba Rh Mathew Bena Abun Sg Yong Kapit.
Iya mega madah, bansa Dayak di menua pesisir meseti ngembuan ulah ke positif ti deka chakah gawa, ngemeranka teknik betanam betupi moden sereta ngaul diri ba pengawa dagang.
“Perintah udah nyendiaka perengkaguna tang tanah kita meseti dikereja ngambika ulih ngemansutka asil.
“Kita mega anang enda bebendar gawa lalu belajarka teknologi moden ba pengawa betanam.betupi ngambika ulih nyungkak asil kita,” ku iya.
“Kelimpah ari nya, kita mega anang enda beratka pelajar sekula anak kita ngambika sida bulih pemujur.
“Kita ditu benasit amat laban bisi pengari rayat baka YB Jamit enggau Datuk Nanta ti chakah gawa mantu kita,” ku Rundi.
Ngena awak nya, iya lalu ngungkupka belanja RM 10,000 ngagai JKKK Mathew Bena lalu RM 10,000 agi ngaga Biro Indu rumah panjai nya.
— DayakDaily
