Nama chalun BN udah diserah ngagai Najib

Datuk Patinggi Abang Johari Tun Openg

KUALA LUMPUR: Rintai nama chalun Barisan Nasional (BN) ungkup Pengawa Bepilih Besai ke-14 udah diserah ngagai BN Pusat, Datuk Seri Mohd Najib Tun Razak ngambika diserenih, pia ku Datuk Patinggi Abang Johari Tun Openg kemari.

Iya ke mega BN Nengeri madah, Najib tau ngaga pemutus ba chalun ke disadang, pengudah nerima rintai nama nya ari parti komponen BN ke deka enggau bepilih.

Taja pia iya enggai mantaika rintai nama nya.

“Aku udah nerima rintai nama chalun ba renggat nengeri tang pekara tu udah aku serah ngagai Chairman BN Pusat (Najib) ngambika ngaga pemutus” ku iya pengudah ngulu sesi townhall Begulai enggau Abang Jo beserimbai enggau Program Lan Berambeh Anak Sarawak (LBAS) 2017 di Dewan Tun Razak, Pusat Dagangan Dunia Putra (PWTC).

Dulu ari nya ba program ke sama, iya nyemetak madahka Sarawak deka majak negika hak nengeri ke udah lenyau kelimpah numbuhka sekeda inisiatif dikena ngemansangka nengeri.


Lebuh ke nyaut tanya bekaul penatai exMenteri, Besai Tun Mahathir Mohamad ke Sarawak ba Kimpin Besai Pakatan Harapan empai lama udah, iya pechaya rayat Sarawak enda mudah teparuk runding mendingka jaku penyakal.

Ku iya, mayuh peminta kitai enda dikeibuh lebuh iya agi nyadi Menteri Besai, tang ari baruh pegai PM ke diatu bemacham pemansang udah dikemendarka Najib nyengkaum ngaga Pan Borneo Highway (PBH) ke sebaka pemanah enggau jalai di Semenanjung.

Kelimpah ari nya kitai mega udah bisi pengari dalam Kaunsil Chairman Petronas,ku iya.

“Kita ngemeratka pengidup rebak baru jrmah ila lalu kitai mega ngemeratka pemansang enggau politik ti ngamatka semaya enggau rayat.

“Orang Sarawak ukai paloi,” ku iya nyemetak seraya madahka semaya penyakal maya ba kimpin besai nya semina panjuk aja.