Kompeni ari Sarawak dipilih nerima Anugerah Kepimpin ASEAN

Digital devices and data. — DayakDaily.com file pic. // Photo: Pixabay

KUALA LUMPUR: eBario Sdn Bhd enggau Bank Simpanan Nasional (BSN) nerima ‘Anugerah Kepimpinan ASEAN’ Ketiga kali ba pekara Pemansang Menua Pesisir enggau Ngemunaska Penyeranta ditu, ensana.

Kedua-dua organisasi nya entara 18 penerima anugerah ari 10 menua kaban ASEAN ti disuaka Menteri Pemansang Menua Pesisir enggau Kandang Menua Datuk Seri Ismail Sabri Yaakob.

Ba pengerami nya Ismail Sabri madahka entara batang tuju meri gelar nya ngambika bisi dikena ngakun sereta meri terima kasih ngagai bantu gerempung ukai dikuasa perintah (NGO) enggau kompeni peribit ba pemansang menua pesisir sereta munaska penyeranta.

Ku iya, gelar nya ulih meransang NGO enggau kopeni peribit ngambika chakah agi nyaup ngemansangka peranak menua pesisir dalam menua sida empu kelebih agi ba pekara ngangkatka Peranak ASEAN.

eBario bejalaika projek mai tama komputer enggau bungkur internet ngagai peranak ti nguan kandang menua ulu di utara Sarawak lalu BSN nyendiaka bungkur ejen bank ke berejista ti meri servis baka mayar bil sereta ngeluar duit kelebih agi di menua pesisir.


Dulu ari nya raban menteri enggau sapit menteri bekaul pemansang menua pesisir ari raban menua ASEAN ngulu aum sehari ti berambaika leka jaku “Tranformasi Luar Bandar : Mempertingkatkan Modal Insan Ke Arah Masyarakat Luar Bandar Yang Berdaya Tahan” mandangka komitmen Malaysia ba pemansang menua pesisir ti ngemeratka pemansang modal mensia, ti nyadi penambah ke pemansang infrastruktur.

Aum nya berandauka pemansang Langkar Pelin Pengawa bekaul Pemansang Menua Pesisir sereta Ngemunaska Penyeranta (2016-2020) enggau bengkah pengawa bukai dikena nyapai juluk nya.