MIRI, April 6: Berita manah ke dianti-anti Bekenu, nyadi nyata lebuh Menteri Besai Datuk Seri Najib Tun Razak ngungkupka agih belanja RM55 juta ari perintah besai ke pemansang infrastruktur dagang temuai enggau pengerai di Bekenu.
Menteri besai udah nemuai seraya gawa ketiga kali ke pasar Bekenu pengudah mangku pengawa nya semilan taun ke udah, madahka ungkup belanja RM50 juta dikena ngaga sebuah klinik pengerai baru dalam sitak Kunsil Negeri (DUN) Bekenu.
“RM5 juta agi dikena ngaga esplanad di seberai Bekenu,” ku iya lebuh ke bejaku pandak ba pengerami ngirup lemai di pasar Bekenu kemari.
Najib ke mega Chairman Barisan Nasional (BN) dekaka peranak di pasar Bekenu meri sukung penuh ngagai chalun BN ba pengawa bepilih besai ke-14.
Dulu ari nya Najib disempulang Kepala Menteri Sarawak Datuk Patinggi Abang Johari Tun Openg ngawakka diri ninjau pasar Bekenu pengudah datai ari Bakun nguna helikopter.
Lebih 5,000 iku peranak pasar Bekenu ngemenuhka esplanad kenyau ari pukul 10 pagi nganti penatai raban menteri besai enggau kepala menteri.
Berebak enggau nya Menteri Muda Orang Indu, Ruang Bilik enggau Pemansang Tumu Nembiak Mit ke mega Kaban Kunsil Negeri Bekenu, Rosey Yunus madah, bisi 60,000 peranak ari kandang menua Niah enggau Sibuti deka ngasaika pemaik klinik Pengerai baru nya beoperasi ila.
“Kitai ngarapka pengawa ngaga klinik pengerai ke baru nya ulih dikejampat laban udah bulih pemendar ari menteri, besai” ku iya seraya madahka palan endur ngaga nya di Niah.
Ku iya, naka ke diatu bisi klinik pengerai mit beroperasi ditu tang enda tetapika penyampau orang ke sakit ti mayuh ke alai sida diasuh berubat ke Klinik Pengerai Miri ti majak dedat.
Sentang projek esplanad baru di kampung seberai, iya madah, kelimpah nambahka potensi dagang temuai, nya deka nyadi projek nagang ampuh sereta palan aktiviti lumba ai ngagai raban biak bagi di pasar Bekenu. — DayakDaily
