PETALING JAYA, Mei 12: Datuk Seri Najib Tun Razak ngaga pemutus nyurutka diri mangku pengawa nyadi presiden Umno.
Pemutus nya dibantaika ba aum media ti diatur pengudah aum Kaunsil Besai Umno ke diatur ba Indu Opis di Menara Dato’ Onn di Kuala Lumpur tadi.
Ku Najib, pemutus nya diambi iya pengudah Barisan Nasional (BN) alah besai ba Pengawa Bepilih Besai Ke14 (PRU14) tu tadi.
Ba aum pemberita nya Najib madahka Datuk Seri Ahmad Zahid Hamidi, deka mangku pengawa nyadi presiden UMNO lalu Datuk Seri Hishamuddin deka nyadi sapit presiden.
Taja pan enda agi nyadi presiden tang Najib madahka diri agi meri sukung ngagai UMNO seraya ngarapka parti nya pulai kering baru baka ke sebedau tu.
Nengah awak nya mega iya ngenataika terima kasih ngagai semua kaban UMNO enggau BN ti udah nyukung iya sekumbang ke nyadi presiden UMNO enggau Menteri Besai sebedau tu.
Sama bisi ngulu aum media nya, ketuai nembiak UMNO Khairy Jamaluddin, Ketuai Puteri Umno Datuk Mas Emieryati Samsudin enggau eksekutif sekretari UMNO, Datuk Seri Ab Rauf Yusoh serera enda tinggal mega kaban exco Indu, Puteri enggau Nembiak UMNO. — DayakDaily
