SRI AMAN, Feb 3: Ungkup belanja besai ke nyauka RM1 bilion diberi Perintah Besai dikena ngemansangka kandang menua ulu entigis enggau menua pesisir di Sarawak taun siti nyin tadi, nyata mandangka Menteri Besai Datuk Seri Najib Razak deka negapka pemansang di negeri tu, pia ku Sapit Kepala Menteri, Datuk Amar Douglas Uggah Embas.
Ku iya, nya lalu meri empas ngagai positif ngagai sosioekonomi rayat.
Ku iya, penemuai PM baka selama ukai semina datai mai jai puang, tang mai bemacham projek pemansang ke ulih mantu negeri enggau rayat kelwbih agi di ulu entigis enggau menua pesisir.
“Tu kelai nyata amat sayauka Sarawak dibanding Tun Dr Mahathir Mohamad ke suah nemuai ke negeri tu mai kari puang sekumbang 22 taun nyadi Menteri Besai.
“Datuk Seri Najib siku Menteri ke suah nemuai ke Sarawak kenyau dichiri ba taun 2009, ke alai segwnap sukut negeri nyengkaum ulu entigis enggau menua pesisir udah dilawa iya,” ku iya ditu kemari.
Uggah madah, Sarawak udh nerima RM950.8 juta agih belanja dikena nampung ungkus ngaga bemacham projek pemansang ari baruh kemata Opis Menteri Pemansang Menua Pesisir enggau Kandang Menua.
“Kelimpah ari nya, Menteri Besai mega bisi ngungkupka RM500 juta agi dikena ngemansangka bungkur telekomunikasi di serata negeri, kelimpah ngemujurka projek ngaga Pan Borneo Highway,” ku iya.
Iya mega ngelalau semua rayat Sarawak ngambika terus nyukung Barisan Nasional (BN) ba Pengawa Bepilih Besai Ke-14 (PRU14) dikena ngetanka tampung enggau momentum projek pemansang ti diperambu. — DayakDaily
