Musin pengerami mai penguntung ngagai orang dagang di Pasar Lachau

Raban orang dagang di Pasar Lachau tu deka mindah ngagai palan baru enda lama agi.

Dikarang Chris Bishop

SRI AMAN, Mei 26: Kurang seminggu sebedau pengerami ngintu Hari Gawai Dayak, Pasar Lachau seharitu didedat mensia mayuh ti ngetu sebedau neruska pejalai pulai ngagai menua diri.

Ukai semina ngetu belelak aja, tang tebal agi sida ngetu ketegal begigaka pemakai (sayur kampung sereta ikan) alai Pasar Lachau dikelala ketegal ti nyual mayuh pemakai bansa Dayak.

Siku orang dagang, Diana Laine madah ba tetiap musin pengerami baikkanya Hari Gawai, Hari Raya, Hari Krismas nyengkaum Taun Baru Cina, Pasar Lachau sigi seruran dedat.

“Nambahka agi ba taun tu, Hari Gawai diintu dampih enggau Hari Raya, kami nyadang mayuh agi orang deka ngetu di pasar tu.

“Udah tentu ba tetiap musin pengerami, asil pengawa bedagang kami ditu jauh nambah enti dibandingka enggau hari bukai,” ku Diana ke asal ari Mukah.

Diana mandangka kasam ikan jelawat ke bisi dijual di bansal dagang iya.

Iya ke bebansa Melanau udah enam taun bedagang ikan salai lajung, lumik, rumpung, kasam ikan jelawat, ikan masin buntal enggau pari di Pasar Lachau.

Ngenang kaul ke sama, Diana madah enda lama agi sida deka mindah ngagai palan dagang ke manah agi ke benung digaga Majlis Daerah Sri Aman (MDSA) diatu.

Ku iya, Pasar Tamu Lachau diatu benung digaga enda jauh ari Balai Polis Lachau iya nya urung 50 meter ari deret kedai endur sida bedagang diatu.

Pasar Tamu Lachau benung digaga diatu. Disadang tembu bulan September 2019.

“Kami orang dagang ngelaluka pengawa MDSA ti ngaga palan endur kami bedagang ditu.

“Udah tentu pengudah tembu ila, palan deka meri pengelantang ngagai kami sereta ngagai orang ke datai,” ku Diana.

Nitihka perambu timpuh projek, Pasar Tamu Lachau disadang tembu digaga ba bulan September 2019. — DayakDaily