KUALA LUMPUR, Okt 25: Nikika gaji minimum pekereja entara lima langgur penemu ti deka dikenataika Majlis Tindakan Ekonomi Melayu (MTEM) ngagai perintah ngambika diperunding dalam Bajet 2018 ke deka dipejurai kena 27 Oktober tu.
Ketuai Pemesai Eksekutif MTEM, Ahmad Yazid Othman madahka piak iya ngarapka deka berunding nikika penyampau gaji minimum nyentuk ke RM1,500 laban beratika penyampau gaji ke baruh entara kebuah besai rayat ditating ungkus pengidup ke majak besai.
“Nitihka Ripot Pansik Penatai Pemisi Isi Rumah 2016 ti dikeluarka Opis Statistik baru-baru tu, bisi 63 peratus rayat Malaysia bulih penatai pemisi nengah kereja begaji lalu laluh nya bulih penatai pemisi nengah pengawa dagang tauka gawa kediri.
“Nya alai kitai ngarap gaji minimum ulih ditiki kelimpah ekosistem dagang ke deka dikemanah dikena nyukung polisi tu,” ku iya ba aum media ditu empai lama udah.
Ku iya, empat langgur penemu bukai iya nya nyeliahka ari chukai barang enggau servis (GST) ungkup industri betanam betupi enggau pemakai, neritka polisi penama enggau ngaduka pekereja menua luar, nyerenih baru polisi beranakka puku ari menua luar sereta ngangkatmanah penyemela penatai pemisi isi rumah.
Nandu baru, Ahmad Yazid madah nyeliahka GST ungkup sektor betanam betupi baka sum enggau rachun beguna amat laban nya pelasar ungkup pengawa bumai ti ngasilka bekal pemakai menua.
“GST ngasuh ungkus betanam betupi nambah lalu nyema ulih dikinsil, nya ulih mantu nurunka ungkus pemakai lalu ba awak ke sama mutarka penanggul ungkus tating pengidup ke ditapi rayat,” ku iya.
Sentang langgur penemu ketiga iya nya neritka penama enggau ngatur pekereja ari menua luar, iya madahka penyampau peranak menua luar ti kelalu mayuh iya nya urung 6.7 juta iku diatu udah ngujungka tikas pelajar menua baruh ari garis guna pengidup ke meri empas besai ngagai pengidup pekereja menua tu kelebih agi raban ke bepenatai pemisi baruh B40.
Berebak enggau nya ku iya, perintah patut berunding ngambika kurang agi bepanggai ba pekerja ari menua luar jemah ila.
Ku Ahmad Yazid,langgur penemu bukai iya nya minta perintah beratika baru polisi pemeranak puku menua luar lalu nentuka industri enggau pekereja menua tu empu bisi urung 70 peratus peluang nya, nyengkaum meri peluang 40 peratus ngagai negeri-negeri ke bekaul.
Ngenang sentang langgur penemu kelima iya nya ngangkatmanah penyemela penatai pemisi isi rumah, iya madahka pekara nya bisi nyadi ba agih penatai pemisi ke alai pengulih penatai pemisi raban B40 majak nurun lalu raban ke bepenatai pemisi pemadu besai (T20) majak nambah.
