MIRI, Julai 6: Kaban Parlimen Miri, Dr Michael Teo Yu Keng udah ngaga ripot polis bekaul siti kes ngelakar ke pemadu baru ngena nama iya.
Dalam kes nya, diberitaka mayuh orang indu dikelakar ngambika meri mata duit tauka barang emas, kenu ku ngambika sida mudah ngulihka bantu duit tauka beras ari opis kaban parlimen nya.
Kelimpah nama iya, nama beberapa iku ketuai Parti Rakyat Bersatu Sarawak (SUPP), mega dipadahka udah dikena ngelakar ti diberita udah di bandar raya nya ba empai lama udah.
“Kami udah ngaga ripot polis, lalu tebal agi ke dikelakar nya orang indu ngambi nyerahka emas enggau mata duit laban kenu ku nengah chara nya, opis aku meri sida bantu duit tauka beras,” Dr Teo madah ngagai pemberita pengudah ngulu dialog enggau Datuk Bandar Miri Adam Yii Siew Sang di opis Majlis Bandaraya Miri ditu kemari.
Ku Dr Teo, sida ke dikelakar nya madahka raban sindiket kenu ku sida, deka meri mata duit tauka beras enti sida datai ngagai opis Kaban Parlimen Miri, tang sida meseti nyerahka barang emas tauka mata duit ngagai sindiket nya dulu ngambikan ngemudah pengawa meri bantu nya. — DayakDaily
