Dikarang Chris Bishop
KUCHING, April 3: Presiden Sarawak Association For Peoples’ Aspiration (SAPA), Dominique Ng ngelalau kaban parlimen ari Sarawak enggau Sabah meretika enggau silik perambu ubah Genteran 1(2) Konstitusyen Federal.
Perambu ubah nya deka dibacha keterubah iya di parlimen ila lalu deka dipejuraika baru kena April 8 enggau 9.
Bejaku ba aum pengarang berita di Kuching seharitu, Ng madah raban ari gempung politik sereta gempung sivil berasai tekenyit ketegal perambu ubah nya mengkang enda dibantai nyentukka diatu.
“Aku ninga semina ila perambu ubah tu deka dibantai lalu deka dibacha ba parlimen.
“Kitai berasai tekenyit serta enda lantang ati ketegal perambu ubah ba Genteran1(2) Konstitusyen Federal tu diselalai nyentukka diatu.
“Pengawa beselalai tu patut enda nyadi ba Malaysia ke lurus diatu,” ku iya.
Ng madah ubah ba kontitusyen federal tu siti pekara ke berat sereta bekait enggau integriti Federasyen Malaysia.
Berindik enggau nya ku iya, nadai kebuah perambu ubah nya diselalai nyentuk ngagai ila.
“Perambu ubah tu patut udah dulu dibantai ngagai peranak Malaysia kelebih agi ngagai rayat Sarawak enggau Sabah.
“Kitai bisi kebuah nemu nama penyadi ngagai status kededua Sarawak enggau Sabah,” ku iya ke mega Ketuai Tim Pekara Undang-Undang SAPA.
Ngenang kaul ke sama, iya enggau nyemetak madah lalu ngelalau kaban parlimen ngambika enda negika leka sebut ‘territories’ tauka wilayah.
Ku iya, reti wilayah ke ditulis dalam bup Konstitusyen Federal mit agi ari kuasa negeri.
Ng netapka Sarawak sereta Sabah patut dikangau nengah nama ‘Nation State’- siti menua besai.
“Kitai (Sarawak) udah kala ngatika diri kenyau taun 1841 nyentuk ngagai 1941 alai maya nya dikangau nengah nama ‘Nation State”, tandu Ng.
Aum pengarang berita nya bela digulu raban Komiti Tim Pekara Undang-Undang SAPA ke bukai. — DayakDaily
