PUTRAJAYA, Jun 14: Opis Menteri Komunikasi enggau Multimedia (KKMM) ngelaluka mensia mayuh meri idea kreatif nengah ngaga logo nyerumba Hari Kebangsaan taun tu.
KKMM ba penerang kemari, madahka logo ke dipilih deka dikena nyadi logo rasmi nyambut Hari Kebangsaan enggau Hari Malaysia taun 2018 ti berambaika leka jaku ‘Sayangi Malaysiaku’.
Ku penerang nya, mensia mayuh ke bisi ati dipinta nganjung logo ke digaga nengah Facebook Merdeka 360 tauka website malaysiamerdeka.my ti nyeretaka nama, nombor telefon enggau e-mel ba kapsyen logo enggau rasional logo nya.
Haribulan tutup nyereta iya nya sebedau tauka kena Julai 7.
Nengah awak nya, KKMM mega meransang mensia mayuh ngenataika langgur penemu dikena ngerami Hari Kebangsaan taun tu lalu perambu nya tau dikenataika ngagai Facebook enggau website ke diatas tadi.
“Penyereta mensia mayuh ngaga logo sereta meri langgur penemu dikena ngerami dikearap ulih ngangkatka semengat patriotisme ba mensia mayuh pupu bansa rambau ke nyambut Hari Kebangsaan enggau Hari Malaysia taun 2018,” ku iya.
Penerang silik, mensia mayuh tau betanya ngagai Urus Setia, Logo Sayangi Malaysiaku, Opis Pemadah Malaysia nengah lumur 016-3585004 (Abdul Rahman Abdul Raof) tauka 013-399 1200 (Aida Mustaffa) tauka e-mel ke harikebangsaanmalaysia@gmail.com. — DayakDaily
