KUALA LUMPUR, Ogos 3: Mekanisme enggau kuing projek besai Jalai Besai Pan Borneo di Sabah enggau Sarawak dijangka deka ditentu sereta diputuska ambis laun pun bulan September tu, pia ku Menteri Kereja Raya Baru Bian.
Ku iya, opis menteri iya deka nyiri injinir perunding peribit ngambi beratika baru pengawa ngaga projek ti ngaul pakej-pakej kereja ti dipejalaika kontraktor projek nya bepelasarka kereja injinir ke pemadu manah
“Kena 24 Julai tu tadi opis menteri iya udah dipinta opis menteri Wang nyerenih baru ungkus enggau bungkur kereja projek Pan Borneo Sabah enggau Sarawak. Opis menteri nya udah ngenataika perambu nyiri injinir perunding peribit ngambi bejalaika pengawa nyerenih nya,” ku iya, Maya Tanya Bala Menteri di Dewan Rakyat, kemari.
Iya nyaut tanya Chan Foong Hin (DAP-Kota Kinabalu) ti nanyaka penyampau ungkus ke bekaul enggau ngupah Borneo Highway PDP Sdn Bhd ke nyadi Bakih Ngaga Rakan Projek (PDP) di Sabah.
Baru madahka anggar semua ungkus projek di Sabah iya nya RM12.86 bilion ke dibahagi ngagai 35 pakej kereja. — DayakDaily
