PUTRAJAYA, Jun 16: Opis Menteri Betanam Betupi enggau Bumai deka ngaga siti mekanisma baru dikena ngetanka rega barang ke diguna sereta ngatur penyemela entara peneka enggau pinta nengah chara sistematik.
Menteri opis nya Salahuddin Ayub madah, mekanisma nya deka nentuka stok chukup lalu rega barang ulih dibeli rayat sereta numbuhka semekih ba barang ke diguna.
“Nya ulih nentuka rega barang ke diguna mengkang ba tikas ke patut sereta ulih dibeli rayat pengudah Chukai Nyual enggau Servis (SST) diterit dalam bulan September,” ku iya madah ngagai media ba atur nyambut pengabang di rumah Menteri Besai Tun Dr Mahathir Mohamad di Seri Perdana kemari.
Salahuddin mega madahja regabarang ke diguna nyerumba Hari Raya udah nurun dibanding enggau taun siti nyin tadi.
“Ambika chunto, rega manuh nurun ngagai RM5-RM6 (satu kg) dibanding enggau urung RM7 taun nyin tadi, lalu reha sayur ke bisi mega nurun 50 peratus dibanding enggau rega taun siti nyin tadi.
“Rega dagin mega nurun entara 30-50 peratus ari taun siti nyin tadi,” ku iya.
Lebuh ke dipinta ngelansa monopoli Syarikat Padi Beras Nasional (BERNAS), Salahuddin madahka ripot model baru deka tembu dalam timpuh sebulan.
“Aku udah minta Kaunsil Penyanding Penemu Betanam Betupi Menua, pakar enggau pemesai dalam ba opis menterinya empu sereta siti gerempung ngatika diri mantaika beberapa keretas perambu.
“Semua ripot deka diserenih ngambika bisi siti model baru sebedau dipejuraika ke kabinet ila,” ku iya.
Opis Menteri nya mega dekaka monopoli BERNAS diketu ngambika ulih ngaga markit ke lebih tebuka ngagai asil padi enggau berau menua kelimpah ngaga semekih ke manah entara serikat kekaul enggau industri nya. — DayakDaily
