Mayuh pekara deka dibantai KM maya bejuraika Bajet Negeri ba Aum DUN enda lama agi

Abdullah (tengah) maya bejadi Karnival Belia beserimbai enggau Pesta Limau Bintangor 2018, di Tebing Sungai Bintangor.

KUCHING, Oct 25: Menteri Muda ba Opis Kepala Menteri (Pekara Korperat), Abdullah Saidol madahka mayuh bengkah pekara deka dibantaika Kepala Menteri Datuk Patinggi Abang Johari Tun Openg maya bejuraika Bajet Negeri ba Aum Kunsil Negeri ti deka diatur enda lama agi.

Nya nyengkaum pekara ke berat mungkur semua rayat nyengkaum di menua pesisir enggau ulu entigis dikena nentuka sida ulih ngasaika pengelantang.

“Maya nya ila rayat ulih beratika pengulih perintah Gabungan Parti Sarawak (GPS) ngatur Negeri Sarawak,” ku iya.

Iya madah munyi nya maya bejaku bejadi Karnival Belia beserimbai enggau Pesta Limau Bintangor 2018, di Tebing Sungai Bintangor bedau lama udah.

Nengah awak nya mega iya minta semua rayat terus meri sukung penuh ngagai perintah negeri ba pengawa ngambi pulai hak negeri nitihka konstiusyen ti udah diungkup ngagai Sarawak nengah Sempekat Malaysia 1963 (MA63).

“Aku minta rayat Sarawak berakup ngambika pinta kitai didinga nyemetak sereta dipebasaka ti deka pulaika pemaik lalu meri asil ke manah ngagai randau nya,” ku iya.

Kelimpah ari nya, iya mega madahka diri berasai asa ati laban bisi sekeda projek rayat ti udah dikemendarka ari baruh pegai perintah Barisan Nasional (BN) ke sebedau tu, dikinsil perintah besai PH ke diatu.

Ku Abdullah, pengawa ngaga projek nya ukai masau belanja tang deka meri mayuh pemaik ngagai rayat ti diau di menua pesisir enggau ulu entigis.

Taja pia, perintah negeri tetap deka neruska agenda pemansang ngambi pulaika pengelantang semua rayat.

Ku iya baru, sukung penuh ari rayat beguna amat dikena nentuka semua pemansang ke udah diperambu, ulih dikemujurka magang.

“Politik ti manah iya nya ngemeratka pengelantang pendiau rayat sereta nentuka penyerakup diintu belama,” ku iya.

Program nya diatur Pampang Nembiak Parti Pesaka Bumiputera (PBB) Meradong besaup enggau Raban Pengatur Pesta Limau 2018.

Ba pengerami nya, Abdullah bisi nyuaka bantu sepenyampau RM75,000 ngagai mayuh bengkah gerempung dalam sitak Kunsil Negeri Semop sereta RM50,000 ngagai Serakup Tuai Rumah enggau Komiti Pengatur Pesta Limau 2018. — DayakDaily