KUALA LUMPUR, Feb 17: Menteri Besai Datuk Seri Najib Tun Razak mengkang ngelalaika maya pengawa bepilih deka diatur.
Pemberita nanya pekara nya beserimbai enggau Pengerami Nyambut Temuai Taun Baru Cina MCA kemari.
“Kemaya, kemaya … kemaya kita deka nya diatur?” pia ku Menteri Besai nyaut pemberita lebuh ke ditanya bekaul maya pengawa bepilih, seraya disambut ketawa ari raban media.
Timpuh Parlimen lima abis timpuh kena Jun 24 taun tu lalu pengawa bepilih besai meseti diatur dalam timpuh 60 hari pengudah parlimen direrak, reti nya PRU diatur kena Ogos 23 taun tu.
Dulu ari nya, Najib meri Selamat Taun Naru Cina ngagai komuniti Cina enggau semua ke nyambut pengwrami nya di serata menua enggau dunya.
“Aku arapka Taun Baru Cina taun tu mai pemaik ngagai semua,” ku iya.
Iya mega madahka Malaysia nyukung inisiatif menua China ‘One Belt One Road’ lebuh ke ditanya bekaul enggau nya.
“Nya inisiatif ke manah lalu kami meri sukung penuh.
“Malaysia mega sebagi ari inisiatif nya,” ku iya.
Dulu ari nya, Najib enggau bini Datin Seri Rosmah Mansor begulai enggau bala temuai dijamu pemakai asal menua tu enggau beperindang ba pengerami nya. — DayakDaily
