KUCHING, 8 JULAI: ADUN Pakan Tan Sri William Mawan Ikom ngelaluka perambu ngangkat Pelilih Pakan nyadi palan pematak dagang temuai ke baru di Sarawak.
Ku iya, pengerami ninting taun ke bisi diatur di Pakan iya nya Pesta Pakan sereta Ekpedisyen Lumbong Panglima Rentap di Bukit Sibau, Nanga Wak tau matak temuai datai.
“Kededua pengerami tu udah tentu ulih matak orang dagang temuai datai ngelawa Pakan,’ ku iya nengah siti surat penerang berita seharitu.
Tambah Mawan, Ekpedisyen Entuka 4WD bisi mega diatur ninting taun nyerumba Pesta Pakan alai ekpedisyen nya jemah ila ulih diatur manah agi.
Iya mega ngelaluka penatai raban ari Opis Dagang Temuai Malaysia(MOTAC) ti deka milih rumah panjai di Pakan ke tau diangkat ngatur Program Nyemilik.
“Atur tu udah tentu deka nyaup ngelaku produk dagang temuai negeri lalu dipasuk dalam kalendar dagang temuai Sarawak.
“Kitai sereta komuniti di Pakan nyukung inisiatif Perintah Besai nengah MOTAC ti keran deka ngelakuka dagang temuai dalam menua,” ku iya.
Mawan nambah, Pintu Gerbang Pakan ke benung digaga nengah ungkus RM100,000 deka nyadi siti agi ikon Pakan ke baru.
Berindik enggau nya, iya pechaya inisiatif dagang temuai deka nyaup ngangkatka ekonomi peranak ke diau ngelingi Pakan.—DayakDaily
