Mawan madahka diri diatu nyadi kaban PBB

Tan Sri William Mawan Ikom

KUCHING, Mac 21: Kaban Parlimen Saratok Tan Sri William Mawan Ikom mantaika diri udah nyadi kaban Parti Pesaka Bumiputera Bersatu (PBB).

Ku iya, nya lalu ngetuka nerita selebubu sentang bagi parti komponen Barisan Nasional (BN) ke diseretai iya kenyau ari taun 2016 nya.

Iya ngelempaika ba ketuai BN enggau PBB sentang status iya nyadi chalun ba Pengawa Bepilih Besai Ke-14 (PRU14) ila.

“Aku deka bebasaka pemutus sida,” ku iya lebuh dikerandau kemari.

Mawan ke mega Kaban Kunsil Negeri (ADUN) Pakan mantaika pekara nya pengudah sehari entara enggau Kepala Menteri ti mega Chairman BN Negeri Datuk Patinggi Abang Johari Tun Abang Openg madahka BN enda ngambi chalun terus bediri minta pilih ba PRU14.


Ku Mawan, udah datai ba maya ke patut iya mantaika diri nyadi kaban PBB ngagai mensia mayuh.

“Aku udah nyadi kaban PBB kenyau ari taun 2016. Lumur siri aku nyadi kaban parti iya nya 470000.

“Aku diambi nyadi kaban parti ketegal penyaru sentang status sekeda chalun bebakih enggau BN ba Pengawa Bepilih Kunsil Negeri 2016,” ku iya.

Ngenamg pasal status iya nyadi ba PRU14, Mawan ke mega ex-Presiden Parti Demokratik Progresif Sarawak (SPDP diatu PDP) enggau Parti Tenaga Rakyat Sarawak (TERAS) nyerahka nya ngagai ketuai BN enggau PBB.

Iya mega madah deka bebasaka sebarang pemutus ke digaga ketuai parti sentang chalun di Saratok. — DayakDaily