Sarawak bulih RM439,529 asil ari chukai dagang temuai — Abdul Karim

Tourism, Arts, Culture, Youth and Sports Minister Datuk Abdul Karim Rahman Hamzah

KUCHING, Mac 21: Sarawak bulih RM439,529 ari asil chukai dagang temuai ti digumpul perintah berengkah ari Sept 1 nyentuk Dis 31 taun siti nyin tadi di negeri tu.

Menteri Dagang Temuai, Art, Main Asal, Nembiak enggau Main negeri Datuk Abdul Karim Rahman Hamzah madahka sebedau tu Opis Menteri Wang madahka tetiap RM10 ke digumpul, RM1 deka dipulaika ngagai perintah diserahkan negeri, tang pekara nya udah diserenih baru.

Ku iya, perintah udah nya setuju merik RM5 ari RM10 asil chukai dagang temuai ke digumpul ari peranak menua luar ti bemalam ba hotel negeri tu.

“Dalam timpuh empat bulan nya, Sarawak udah bulih RM879,058,” ku iya dalam ba aum media pengudah Aum Komiti Malin Temuai idang Sarawak(STSC) 1/2018, ditu.

Sama bisi datai, Menteri Muda Nembiak Lumba enggau Main negeri, Datuk Snowdan Lawan.


Bejaku baru, iya madahka asil ke diulih nya agi mimit dibanding enggau Kuala Lumpur, Sabah, Pulau Pinang sereta Johor Bahru ti ngembuan mayuh hotel.

Iya mega madah, sida deka ngambi atur kontinjensi sereta nyiri malin temuai sementara ke nemu bejaku Mandarin, berindik ari penatai temuai menua China ke majak nambah pengudah penerebai keterubah ari Shenzhen ke Kuching dilanchar ba bulan Disember taun nyin tadi.

“Kitai bisi 200 iku malin temuai di negeri tu tang ukai semua landik bejaku Mandarin dikena nangkup pinta temuaike mayuh ari menua China,” ku iya.

Iya mega madah, kenyau ari bulan Januari nyentuk Mac tu, bisi 20,000 iku penumpang udah nguna jalai penerebai ari Shenzhen-Kuching enggau Kuching-Shenzhen. — DayakDaily