KABONG, May 5: Tan Sri Willam Mawan mengkang dikerindu rayat lalu patut dichalun baru ngarika di Barisan Nasional (BN) ba sitak P. 205 Saratok maya Pengawa Beplih Besai Ke-14 (PRU14) tu ila.
Pekara nya dibantaika peranak ditu ti datai bebala mayuh kemari ke mai banner ti ditulis “Kami Dekaka Tan Sri William Mawan Nyadi Chalun P.205 Saratok”.
Ku sida ke bisi datai, Mawan patut terus diberi peluang ngenanka kerusi ti dikuasa iya diatu pengudah menang ba PRU13 suba.
Ketuai raban bansa ba sitak nya mega madahka Mawan komited bejalaika pengawa sekumbang nya pengari rayat sereta meretika peneka rayat ditu kelebih agi di Kabong.
Mawan patut dichalun baru ngetanka sitak P.205 Saratok laban iya bebendar gawa mendingka penanggul rayat sereta ninjau pemansang projek ditu. Tambah mega iya udah serap dikelala rayat ditu.
Kelimpah dikerindu rayat, Mawan mega bisi meri agih belanja dikena peranak di menua tu ngaga akitiviti.
Sida mega madahka Mawan ngembuan kuing politik ti nyata sereta semampai beratka pemansang infrastruktur, pelajar enggau pengawa rama rakyat ba sitak nya.
Ku sida, Mawan siku ketuai ti nadai bechiping enggau pupu bansa ti ngembuan mayuh adat enggau jalai pengarap ditu lalu sida deka meri sukung penuh ngagai Mawan, lalu PRU14 th mih awak sida malas pemaik tk udah digaga Mawan ke sida.
Gempuru mandangka sukung ngagai Mawan kemari udah disereta beberapa iku pengari raban bansa enggau ketuai pupu bansa di pelilih menua nya. — DayakDaily
